Port Elizabeth: MyPE - Property Poser: Deeltiteleienaars Moet Bewus Wees van hul Regte

www.MyPE.co.za: Ons leser woon in 'n meenthuiskompleks waar twee inwoners volgens haar die afgelope dekade die gedragsreëls totaal en al verontagsaam.

Een van hulle woon langs haar en sy optrede, sê sy, het 'n ernstige impak op haar lewensgehalte. Volgens haar, het sommige keelvol-inwoners al hul eenhede verkoop.

Die "skuldige" partye skuld glo ook groot bedrae aan agterstallige heffings.

Sy sê oor die jare het die verskeie bestuursagente nie die trustees geadviseer hoe om dié inwoners te hanteer nie en/of die trustees het nie die reëls geïmplementeer nie.

Verder is dit haar opinie dat die trustees amper "geheimsinnig" optree en dat geskrewe klagtes aan die bestuursagent nooit beantwoord of erken word nie.

Tania Schaëfer van Schaëfer Attorneys & Conveyancers in Port Elizabeth sê, kragtens artikel 35(1) van die Deeltitelwet Nr 95 van 1986, word deeltitelskemas deur bestuurs- en gedragsreëls beheer en bestuur.

"Indien die standaard-reëls, of dié wat deur die ontwikkelaar ingestel is, nie effektief is nie, mag die eienaars die reëls vervang of uitbrei om by die behoeftes van die betrokke skema te pas."

Schaëfer sê 'n effektiewe manier om gedragsreëls af te dwing, is deur die oplegging van waarskuwings en, indien oortreders nie gehoor gee nie, boetes.

Volgens haar moet bogenoemde deur die trustees, wie jaarliks deur die eienaars gekies word, hanteer word. "Dit kan ook aan die bestuursagent gedelegeer word."

Schaëfer sê hoewel die doel van die gedragsreëls is om die wyse waarop die inwoners hulself gedra, te reguleer, sal dit slegs effektief wees indien dit op eienaars en inwoners afgedwing word. "Eienaars en inwoners moet besef hulle het die mag om hul regte te beskerm en om nie deur 'n paar inwoners geterroriseer te word nie."

Sy sê dit vereis egter dat die eienaars en inwoners pro-aktief aan die bestuur van die skema moet deelneem. "Hulle kan dit doen deur oortredings en ongewenste gedrag by die trustees of bestuursagent aan te meld."

Verity Bigara van Rawson Properties PE sê eienaars moet ook die moeite doen om die vergaderings van die regspersoon by te woon en om die trustees dáár opdrag te gee om ongewenste situasies aan te spreek.

"Daar is 'n plig op die trustees om hul funksies (soos beskryf in die Deeltitelwet) behoorlik uit te voer. Dit sluit in om oortredings en klagtes te ondersoek en aan te spreek, om stappe te neem om heffings in te vorder, ensovoorts."

Bigara sê indien die trustees hul take nie uitvoer nie, verbreek hulle die vertrouensplig wat die wet op hulle plaas en kan hulle, in sekere omstandighede, persoonlik aanspreeklik gehou word vir skade wat deur die regspersoon gely word.

"Indien eienaars voel dat die trustees nie hul verpligtinge uitvoer nie, kan hulle nuwe trustees by die algemene jaarvergadering kies. Andersins kan hulle stappe, soos voorgeskryf deur die wet, neem om die trustees af te dank en nuwes te kies."

Indien die bestuur van die skema deur 'n bestuursagent hanteer word wat nie hul mandaat doelgerig uitvoer nie, kan hul dienste beëindig word en 'n nuwe agent aangestel word, aldus Bigara.

"Hoewel dit verstaanbaar is dat eienaars wie hulself in die leser se posisie bevind, magteloos voel, is dit noodsaaklik dat hulle hulself bemagtig deur kennis in te win aangaande hul regte."

CLICK HERE to have your property related questions answered courtesy of Coetzee Gouws from Full Stop Communications.